2026 оны намрын ургац хураалтын ажилд Зэвсэгт хүчний бие бүрэлдэхүүн манлайлан оролцож, улс орны хүнсний аюулгүй байдлыг хангахад хувь нэмрээ оруулж байна. Энэ жилийн хувьд таримлын болц жигд байгаа хэдий ч зуны цаг агаарын нөхцөл байдлаас шалтгаалан ургац хураалт өмнөх жилүүдээс 5-10 хоногоор хоцорч эхэлжээ. Тиймээс ургацыг богино хугацаанд, хорогдол багатай хураан авахын тулд цэргийн алба хаагчид цаг хугацаатай уралдан ажиллаж байна. Засгийн газрын шийдвэр болон Зэвсэгт хүчний Жанжин штабын даргын тушаалаар Хуурай замын цэргийн нэгтгэл, ангиудаас томилогдсон алба хаагчид Төв, Сэлэнгэ, Дархан-Уул аймгийн тариалангийн бүсэд ажиллаж байгаа юм. Тодруулбал, Төв аймгийн Жаргалант, Борнуур, Угтаалцайдам, Батсүмбэр, Сэлэнгэ аймгийн Мандал, Баянгол, Орхон, Сант, Дархан-Уул аймгийн Орхон суманд нийт 40 орчим бүлэгт хуваагдан ургац хураалтын ажилд оролцож байна. Мэргэжлийн байгууллагуудын урьдчилсан мэдээгээр есдүгээр сарын сүүлч болон аравдугаар сарын эхний арав хоногийн эцсээр тариалангийн бүс нутгуудад нойтон цас орж, цочир хүйтрэх төлөвтэй байгаа аж. Иймд цэргийн алба хаагчид цаг агаарын эрсдэлээс урьтаж, ургацыг богино хугацаанд, алдагдалгүй хураан авахад анхаарч, шуурхай ажиллаж байна.

СУИС-ийн бүлэг хүчингийн хэргийн хохирогч Н.Шинэцэцэг өнөөдөр ХЭҮК-т гомдол гаргажээ. Тэрбээр гомдолдоо “Монгол Улсын иргэн Наранхүү овогтой Шинэцэцэг миний дээрх тунхаглал болон хууль тогтоомжид заагдсан цаашилбал хүн болж төрсний хувьд заавал эдлэх ёстой байгалиас заяасан заяагдмал эрх эрх чөлөө минь зөрчигдсөн. Улмаар уг эрх, эрх чөлөөгөө эдэлж чадахгүй байгаа нөхцөл байдал өөрөөс минь биш бусдаас, магадгүй хүний эрхийг хамгаалж хууль сахиулах ёстой байгууллагуудын үйл ажиллагаанаас шалтгаалж байгаа эсэхэд эргэлзэж байгаа тул танай байгууллага хандан гомдол гаргаж байна. Хохирогч миний нэр төр, хүний эрхийг хамгаалж, нөхцөл байдлыг дордуулахгүй байх талаас дүн шинжилгээ хийж, та бүхэн байр сууриа илэрхийлэн дүгнэлт хийж өгөөч гэж хүсэж байна” гэжээ.

Монгол Улсын Ерөнхий сайд Н.Учрал 2026-2027 оны өвөлжилтийн бэлтгэл хангах үүрэг даалгаврын хэрэгжилтийг хянаж, аймаг, нийслэлийн удирдлагуудтай уулзаж, 2026 оны төсвийн тодотгол, 2027 оны төсвийн төслийн талаар товч мэдээлэл өглөө. Хуралдааны эхэнд Ерөнхий сайд малчин өрх эрсдэл багатай, дулаан өвөлжих, хүүхдүүд хичээлдээ саадгүй явах, эмнэлгийн тусламж цагтаа хүрэх, хүнсний нийлүүлэлт тасалдахгүй байх, бизнес хэвийн ажиллах нөхцөлийг бүрдүүлэхэд анхаарч ажиллахыг Засгийн газрын гишүүд, аймаг, нийслэлийн Засаг дарга нарт даалгалаа. Мөн ордон тойрсон улс төр дотор, гаднагүй байна. Иргэдийн амьдралд шийдэх асуудал түүнээс ч их байна. Тиймээс төрийн бүх шатанд улс төрөөс илүү ажил, үр дүн, хариуцлага шаардаж ажиллахаа Ерөнхий сайд анхааруулав. Засгийн газар 2026 оны төсвийн тодотгол, 2027 оны төсвөө хүндээ зориулна. 769 мянга байгаа тэтгэврийг багадаа нэг сая болгоно. Цалин нэмнэ. Татварын ачааллаас хөнгөлнө. Орон сууцны хүртээмж нэмэгдүүлж ажиллахаа илэрхийллээ. Ерөнхий сайд аймаг, нийслэл бүр өвөлжилтийн бэлтгэлийн үлдсэн асуудлаа нэг бүрчлэн тодорхойлж, асуудал нь юу, хэн хариуцах, хэзээ, ямар эх үүсвэрээр шийдэх вэ гэсэн дөрвөн асуудлыг заавал тусган ажиллахыг үүрэг болгов. Орон нутгийн удирдлагуудыг өөрийн эрх хэмжээний хүрээнд шийдвэрлэх боломжтой асуудлаа хугацаанд нь шийдвэрлэх, боломж хүрэхгүй асуудлыг Засгийн газар дэмжиж шийдвэрлэнэ гэв. “Асуудал бүр эзэнтэй, ажил бүр хугацаатай, шийдэл бүр үндэслэлтэй, хэрэгжилт бүр хяналттай байна” гэдгийг онцолж, аймаг, нийслэлийн Засаг дарга нарыг нутаг орондоо эзэн байж, иргэдийнхээ өмнө хүлээсэн үүргээ хариуцлагатай хэрэгжүүлэх үүргээ биелүүлж ажиллахыг даалгалаа. Эрчим хүчний салбарт олон жил хуримтлагдсан асуудалтай нүүр тулж байгаа. Үнэнээ нуухгүй. Гэлээ гээд ард түмэндээ ачаа үүрүүлэхгүй, эрчим хүчний тариф нэмэхгүй гэдгийг онцлоод дулааны III цахилгаан станцын асуудлыг шийдвэрлэж, аймгуудын дулааны станцуудын ажлыг шахаж ажиллаж буйг тэмдэглэв. Хуралдаанд Шадар сайд Н.Номтойбаяр, Сангийн сайд З.Мэндсайхан, Хүнс, хөдөө аж ахуй, хөнгөн үйлдвэрийн сайд Ц.Идэрбат болон аймаг, нийслэлийн Засаг дарга нар оролцож өвөлжилтийн бэлтгэл ажил болон орон нутагт тулгамдсан асуудлын талаар мэдээлэл өгч, асуудлуудыг шийдвэрлэхээр ажиллаж буйгаа танилцууллаа.

АНУ-ын Ерөнхийлөгч Доналд Трампын засаг захиргаа Израилд нийт 2.8 тэрбум ам.долларын хүнд жинтэй тэсрэх бөмбөг нийлүүлэхээр төлөвлөж байна гэж “The Washington Post” сонинд эх сурвалж дурдан бичжээ. Тус сонины эх сурвалжийн мэдээллээр, Израилд нийт 20 мянган МК-84 бөмбөг, 20 мянган BLU-117 бөмбөг, мөн тооны BLU-109 бөмбөг худалдахаар ярьж байгаа аж. Гэрээг АНУ-ын зэвсэглэлийг гаднын улс орнуудад зээл, тусламжаар нийлүүлдэг “Foreign Military Financing” механизмын шугамаар хэрэгжүүлэхээр төлөвлөж байна. Доналд Трамп 2025 оны нэгдүгээр сард АНУ-ын Ерөнхийлөгчийн албыг хүлээн авсны дараа Израилд 900 гаруй кг жинтэй тэсрэх бөмбөг нийлүүлэх хоригийг цуцалсан билээ. Жо Байдены засаг захиргаа ийм төрлийн зэвсэглэлийг Газын зурваст хэрэглэж, энгийн ард иргэд олноор үрэгдэхэд хүргэж болзошгүй хэмээн болгоомжилж, тэрхүү хоригийг тавьж байжээ.